ᒪᓕᑦᑐᒋᑦ ᐊᕐᓇᐃᑦ ᐊᒻᒪᓗ ᐊᕐᓇᐃᑦ/ᐊᖑᑏᑦ ᐊᔾᔨᒌᑎᑦᑎᓂᖅ ᑲᓇᑕᒥ, ᑭᓇᑐᐃᓐᓇᖅ (ᐊᖑᑏᑦ, ᐊᕐᓇᐃᑦ, ᐊᕐᓇᐅᖔᓕᕐᓂᕋᖅᑐᑦ/ᐊᖑᑕᐅᖔᓕᕐᓂᕋᖅᑐᑦ, ᐊᕐᓇᐃᑦ/ᐊᖑᑏᑦ ᖃᓄᐃᑦᑐᑐᐃᓐᓇᐃᓪᓗ ᑭᒃᑯᑐᐃᓐᓇᐃᑦ) ᐱᓂᕐᓗᑦᑕᐅᔪᓐᓇᖅᑐᑦ ᐊᕐᓇᐃᑦ/ᐊᖑᑏᑦ ᒪᓕᓪᓗᒋᑦ ᐋᓐᓂᖅᑕᐅᕙᑦᑐᑦ. ᓴᙱᓂᖅᐹᒃᑯᑦ ᐊᑑᑎᖃᕈᓐᓇᖅᑐᖅ ᐱᓕᕆᐊᕆᓂᐊᕐᓗᒍ ᐊᕐᓇᐃᑦ/ᐊᖑᑏᑦ ᐋᓐᓂᖅᑕᐅᑎᓪᓗᒋᑦ ᑕᑯᓴᐅᑎᑦᑎᓗᑕ ᐱᐅᔪᒃᑯᑦ ᑕᑯᓐᓇᒐᖃᑦᑎᐊᓗᑕᓗ. ᓯᕐᓈᖅᑎᐅᑉᐸᑕᓘᓐᓃᑦ, ᐊᑐᕐᓂᑰᑉᐸᑕ, ᓄᓇᓕᓐᓂ ᓯᕗᓕᖅᑏᑦ, ᐱᙳᐊᖅᑏᑦ, ᐃᓕᓴᐃᔩᑦ, ᐅᕝᕙᓘᓐᓃᑦ ᓄᓇᖃᖅᑳᖅᓯᒪᔪᑦ ᐃᓐᓇᕆᔭᐅᔪᑦ, ᐅᓂᒃᑳᖏᑦ ᓴᙱᔫᒻᒪᑕ ᐊᒻᒪᓗ ᑲᔪᓯᓂᖃᑦᑎᐊᕐᓃᑦ ᑕᑯᑎᑦᑎᔪᓐᓇᕐᒪᑕ ᒪᒃᑯᑦᑐᓂ ᓇᓕᒧᑦᑎᐊᕈᓐᓇᕐᒪ ᓯᕗᓂᔅᓴᖏᓐᓂᑦ ᐊᓂᒍᐃᔪᓐᓇᑦᑎᐊᕐᓂᖏᓐᓂᓪᓄ. ᑖᓐᓇ ᐊᑐᖅᑕᐅᓪᓗᓂ ᐃᓅᓯᕐᒨᖓᓪᓚᕆᑦᑐᓐᓄᑦ ᖃᐅᔨᓴᕐᕕᔾᔪᐊᕐᒧᑦ ᐋᖅᑭᔅᓱᐃᓚᐅᖅᑐᑦ ᐊᐃᑉᐸᕇᓄᑦ ᑲᑎᒪᕕᐅᔪᓐᓇᖅᑐᓂ ᐱᔾᔪᑎᖃᖅᑐᑎᒃ ᐊᕐᓇᐃᑦ/ᐊᖑᑏᑦ ᒪᓕᓪᓗᒋᑦ ᐋᓐᓂᖅᑕᐅᕙᑦᑐᓄᑦ ᐋᒡᒌᓯᐅᓚᐅᖅᑐᒥ 2025, ᐊᖅᓴᕐᓃᑦ ᑐᔪᕐᒥᕕᖓᓐᓂ ᐃᖃᓗᓐᓂ.
ᑖᓐᓇ ᑲᑎᓐᓂᐅᓚᐅᖅᑐᖅ ᐋᖅᑭᓱᖅᑕᐅᔪᓐᓇᓚᐅᖅᑐᖅ ᐃᑲᔪᖅᑕᐅᓪᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᑦ, ᐃᓄᓕᕆᔨᒃᑯᑦ ᐱᓕᕆᕝᕕᖓᓐᓂ (ᐃᓚᒌᓄᑦ ᐊᑦᑕᓇᖅᑕᐃᓕᓕᕆᔨᒃᑯᓐᓂᑦ). ᖃᓄᐃᓕᐅᖅᑐᖃᖅᑎᓪᓗᒍ, ᐃᓚᒌᑦ ᓄᓇᓖᓪᓗ ᐊᑦᑕᓇᖅᑐᒦᑦᑕᐃᓕᓂᕐᒧᑦ ᑕᑯᔅᓴᐅᑎᑕᐅᓚᐅᖅᐳᖅ, ᐃᓚᐅᖃᑦᑕᐅᔪᑦ ᑐᑭᓯᐅᒪᑎᑕᐅᑦᑎᐊᖅᑐᑎᒃ ᐊᕐᓇᐃᑦ/ᐊᖑᑏᑦ ᒪᓕᓪᓗᒋᑦ ᐋᓐᓂᖅᑕᐅᕙᑦᑐᑦ ᐊᔅᓱᕈᕈᑕᐅᓪᓚᕆᒻᒪᑦ ᓄᓇᕗᒻᒥ. ᐊᖑᑏᑦ ᐊᕐᓇᐃᓪᓗ ᐋᓐᓂᖅᑎᖅᑕᐅᒐᔪᒻᒪᑕ, ᑭᓯᐊᓂ ᑕᒪᓐᓇ ᑲᒪᒋᔭᐅᒍᒐᔪᖏᑦᑐᖅ ᐅᖃᐅᑕᐅᖃᑦᑕᕋᓂᓗ. ᐊᖑᑎᓄᑦ, ᑲᙳᓇᖅᑑᔪᓐᓇᕐᒪᑦ, ᐅᖃᐅᑕᐅᑎᓪᓗᒍ ᑕᒪᓐᓇ, ᐊᕐᓇᓄᓪᓗ, ᑲᑉᐱᐊᓱᒍᑕᐅᓲᖑᒻᒪᑦ ᐃᓱᒪᒋᔭᐅᑲᒻᒪᓐᓂᐊᖅᑐᒋᔭᐅᓪᓗᑎᒃ ᐃᖅᑲᖅᑐᖅᑕᐅᓪᓗᑎ ᑭᒃᑯᑐᐃᓐᓇᕐᓄᑦ.
ᐱᒻᒪᕆᐅᔪᖅ ᑐᓂᔭᐅᓚᐅᖅᑑᒃ ᐃᓅᓯᕐᒨᖓᓪᓚᕆᑦᑐᓐᓄᑦ ᖃᐅᔨᓴᕐᕕᔾᔪᐊᕐᒥᑦ ᑲᑎᓐᓂᖃᖅᑎᓪᓗᒋᑦ 2025 ᐊᕐᓇᐃᑦ/ᐊᖑᑏᑦ ᒪᓕᓪᓗᒋᑦ ᐋᓐᓂᖅᑕᐅᕙᑦᑐᑦ ᑲᑎᒪᑎᓪᓗᒋᑦ.
ᑖᓐᓇ ᑲᑎᓐᓂᐅᔪᖅ ᑕᑯᔅᓴᐅᑎᑕᐅᓚᐅᖅᑐᖅ ᐃᕙᑦᕗᕋᐃᒃᑯᓐᓂᑦ ᐊᒻᒪᓗ ᐊᓯᖏᓐᓂᑦ ᐃᑭᐊᖅᑭᕕᐅᕙᑦᑐᓂ ᑲᑎᑎᑦᑎᓚᐅᖅᐳᖅ 20−ᓂᑦ ᐃᓚᐅᖃᑕᐅᔪᓂᑦ. ᖃᓄᐃᓕᐅᖅᑐᖃᓪᓚᕆᓚᐅᖏᓐᓂᖓᓂ ᐅᖃᐅᓯᖃᓚᐅᕐᒥᔪᑦ ᐊᐱᖅᓱᖅᑕᐅᔪᖃᖅᑐᓂᓗ ᓰᐲᓰᒃᑯᑦ ᐅᑭᐅᖅᑕᖅᑐᖓᓐᓂ. ᓇᓗᓇᐃᖅᑕᐅᓯᒪᔪᑦ ᑲᑎᓐᓂᐅᓚᐅᖅᑐᒥ ᐊᑭᖃᖏᑦᑐᓂ ᐅᕕᓂᕈᖅᑖᑎᑦᑎᓚᐅᖅᑐᑦ ᖃᓕᐹᖅᑖᑐᑎᓪᓗ ᓇᓴᓕᒻᒥ, ᑐᓂᕐᕈᓯᐊᖅᑎᑕᐅᓪᓗᑎᓪᓗ ᐊᐃᑉᐸᕇᑦ, ᐊᒻᒪᓗ ᓵᓚᖃᐅᓯᐊᖑᓪᓗᓂᓗ ᑮᓇᐅᔭᑦ $1000. ᑖᓐᓇ ᑲᑎᓐᓂᐅᓚᐅᖅᑐᖅ ᐊᑦᑕᓇᖏᑦᑐᒥ ᐃᓂᖃᖅᑎᑦᑎᓚᐅᖅᐳᖅ ᐊᐃᑉᐸᕇᑦ ᐊᔾᔨᒌᙱᑦᑐᓂ ᐃᓕᖅᑯᓯᓖᑦ ᐊᒻᒪᓗ ᓇᑭᙶᕈᓘᔭᖅᑐᑦ ᐅᖃᐅᓯᖃᖅᑐᑎᒃ ᐱᐅᖏᑦᑑᒐᓗᐊᓂ ᐊᑲᐅᖏᑦᑑᒐᓗᐊᓂᑦ, ᐅᖃᐅᓯᖃᖅᑐᑎᓪᓗ ᐊᑐᖅᓯᒪᔭᖏᓐᓂᑦ, ᐊᒻᒪᓗ ᖃᓄᖅᑑᕈᑎᖃᖅᑐᑎᒃ ᐋᖅᑭᒍᑕᐅᔪᓐᓇᖅᑐᓂ ᑐᙵᕕᖃᖅᑐᓂ ᐃᓄᐃᑦ ᐱᖅᑯᓯᖏᓐᓂᑦ ᐃᓚᓕᐅᑎᓗᒍᓗ ᐅᓪᓗᒥᐅᓕᖅᑐᓄᑦ ᐊᐃᑉᐸᕇᓄᑦ ᐋᖅᑭᒋᐊᕈᑕᐅᔪᓐᓇᑦᑐᓂ. ᐅᖃᐅᓯᓚᐅᖅᑐᑦ ᐃᑲᔪᖅᑕᐅᓪᓗᑎᒃ ᒥᔅ ᑕᕕᓐ ᒥᐅᑦᒪᒧᑦ.
ᐊᒥᓱᑦ ᐃᓚᐅᖃᑕᐅᔪᑦ ᓇᓗᓇᐃᖅᓯᓚᐅᕐᒥᔪᑦ ᐱᒻᒪᕆᐅᓂᖓᓂᒃ ᑲᑎᓐᓂᐅᔪᒥ, ᓴᖅᑭᔮᖅᑎᑦᑎᓪᓗᑎᒃ ᐃᓅᓯᖏᓐᓄᑦ ᓄᓇᓕᖏᓐᓄᓪᓗ. ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᐅᑲᐃᓐᓇᖅᑐᖅ ᓄᓇᕗᒻᒥ, ᓘᑦᑖᖅ ᐃᒃᐅᐊ ᐃᓚᐅᖃᑦᑕᐅᓚᐅᕐᒥᔪᖅ ᑲᑎᓐᓂᐅᔪᒧᑦ:
“ᑖᒃᑯᓂᖓ ᑕᑯᐃᓐᓇᐸᑉᐳᖓ ᐊᕐᓇᐃᑦ/ᐊᖑᑏᑦ ᒪᓕᓪᓗᒋᑦ ᐋᓐᓂᖅᑕᐅᕙᑦᑐᖅ ᐊᒻᒪᓗ ᖁᕕᐊᓱᑉᐳᖓ ᐅᖃᐅᑕᐅᔪᓐᓇᖅᓯᒻᒪᑦ […] ᓂᕆᐅᑉᐳᖓ ᐊᒥᓱᑦ ᐃᓄᐃᑦ ᑲᑎᓐᓂᐅᔪᒧᑦ ᐃᓚᐅᖃᑕᐅᒃᑲᓐᓂᓛᕐᓂᖏᓐᓂᑦ ᑲᑎᒃᑲᓂᖅᑐᖃᓕᕐᒥᑉᐸᑦ.”
ᒥᔅ ᑲᐅᓚ ᐆᔪᑯᓗᒃ, ᑲᑎᓐᓂᕐᒧᑦ ᐃᓚᐅᖃᑕᓚᐅᖅᑐᖅ, ᐱᒻᒪᕆᐅᑎᑦᑎᕗᖅ ᐃᓚᒌᑦ ᓄᓇᓖᓪᓗ ᑭᒃᑯᓕᒪᑦ ᐊᑦᑕᓇᖏᑦᑐᒦᒋᐊᖃᕐᒪᑕ. ᑖᓐᓇ ᑲᑎᓐᓂᕐᓂᖅ ᐊᐃᑉᐸᕇᓐᓅᖓᓂᐊᓚᐅᕋᓗᐊᕐᒪᑦ ᐃᖃᓗᓐᓂ, ᐊᐃᑉᐸᖃᖏᑦᑐᑦᑕᐅᑦ ᐃᓚᐅᖃᑕᐅᓚᐅᕐᒥᔪᑦ. ᐃᓚᐅᖃᑕᐅᔪᑦ, ᐱᖃᑕᐅᓪᓗᓂ ᕙᑎ, ᑖᒃᑯᐊ ᐃᓅᓯᕐᒨᖓᓪᓚᕆᑦᑐᓐᓄᑦ ᖃᐅᔨᓴᕐᕕᔾᔪᐊᒃᑯᓐᓂ ᐊᑐᓕᖁᔭᓕᐅᓚᐅᕆᕗᖅ ᐊᐃᑉᐸᖃᖏᑦᑑᒐᓗᐊᓂ ᐃᓚᐅᖃᑕᐅᓗᑎᒃ ᐋᖅᑭᓱᐃᓗᑎᓪᓗ ᑲᑎᓐᓂᐅᒐᔭᖅᑐᓂ, ᐅᖃᖅᑐᓂ “[…] ᐊᕐᓇᐃᑦ/ᐊᖑᑏᑦ ᒪᓕᓪᓗᒋᑦ ᐋᓐᓂᖅᑕᐅᕙᑦᑐᑦ ᐊᑦᑐᐃᓂᖃᖏᑦᑐᑑᒻᒪᑕ ᐊᐃᑉᐸᕇᑐᐊᓂᒃ.”
ᐊᑕᖐᓗᓂ, ᐊᐃᑉᐸᕇᓐᓄ ᑲᑎᓐᓂᖅ ᑲᑎᑎᑦᑎᓚᐅᖅᐳᖅ ᓄᓇᓕᒻᒥᐅᑕᖃᑎᒌᓂᒃ, ᑕᑯᔅᓴᐅᑎᑦᑎᓪᓗᑎᓪᓗ ᐊᒻᒪᓗ ᓴᖅᑭᔮᖅᑎᑦᑎᓪᓗᑎᒃ ᐱᒻᒪᕆᐅᓂᖓᓂᒃ ᐃᓚᐅᑎᑦᑎᓂᕐᒥᒃ ᐃᓕᔾᔪᑎᒋᔭᐅᓪᓗᑎᓪᓗ ᐃᔾᔪᐊᕈᒥᓇᖅᑐᑦ ᓴᙱᓂᖅᓴᒥᓪᓗ ᓄᓇᓕᖃᕐᓗᑕ ᐱᓕᕆᐊᖃᖅᑎᓪᓗᑕ ᐊᕐᓇᐃᑦ/ᐊᖑᑏᑦ ᒪᓪᓗᒋᑦ ᐋᓐᓂᖅᑕᐅᕙᑦᑐᓄᑦ ᓄᓇᕗᒻᒥ.
ᑎᑎᕋᖅᑐᖅ ᕼᐆᑉ ᕗᑎᐅᕋ, ᐱᓕᕆᔪᖅ ᐊᑭᓕᖅᓱᑦᑕᐅᓐᓇᓂ
ᐃᓅᓯᕐᒨᖓᓪᓚᕆᑦᑐᓄᖅ ᖃᐅᔨᓴᕐᕕᔾᔪᐊᖅ